Алматы қалалық мобильділік басқармасы қыстан кейін пайда болған шұңқырларды жою бойынша қандай көшелерде жұмыстар жүргізіліп жатқанын хабарлады.
«Ақпан айының ортасында асфальт-бетон зауыты мерзімінен бұрын іске қосылып, -5 градусқа дейінгі температурада асфальт-бетон қоспасын нығыздауға мүмкіндік беретін энергия үнемдейтін қоспалары бар «жылы асфальт» шығарды. Қазіргі таңда жол-көлік оқиғасының алдын алу мақсатында 300-ден астам «қалқымалы» люк орнатылды. Бұл құрылым құдықтардың айналасындағы асфальт жабынын сақтауға арналған, өйткені қалқымалы корпусы бар люктер асфальтпен бірге қозғалады. Бұл құдықтардың да, люктердің де қызмет ету мерзімін айтарлықтай ұзартады», – деді басқарма өкілдері.
Сонымен қатар, Рысқұлов, Абылай хан, Райымбек батыр, Төле би магистральдық көшелерінің учаскелерінде ағымдағы (шұңқырлы) жөндеу жұмыстары жүргізілді.
«Бүгінгі таңда жөндеу бригадалары Гоголь көшесінде Назарбаев даңғылынан бастап Орталық мәдениет және демалыс саябағына дейін жұмыс істеп жатыр. Одан кейін Сейфуллин, Қонаев, Мақатаев, Назарбаев, Мыңбаев және т.б. көшелерде жұмыс басталады», – деп атап өтті басқармада.
Сондай-ақ, жақын арада аудан әкімдіктері көше-жол желісіне ағымдағы жөндеу жұмыстарын бастайды. Әр ауданда шамамен 30 мың шаршы метр жол жабыны жөнделеді. Жалпы, биылғы жаз мезгілінде Алматыда 300 шақырым жолдың орташа жөндеу жұмыстары мен 35 шақырым жаңа жол құрылысы жоспарланған.
Айта кетейік, мегаполис тұрғындары @AlmatyJolybot чат-боты (https://t.me/AlmatyJolybot) және Almaty_Joly Telegram-арнасы арқылы жолдағы шұңқырды жөндеу туралы өтініш бере алады.
Өтініш беру үшін:
*Мәтіндік хабарлама,
*Ақаудың фото/бейнематериалы,
*Мекенжайы мен нақты координаттары,
*Байланыс деректерін жолдау қажет.
Келіп түскен өтініштер қаралғаннан кейін әр жағдай бойынша тиісті шаралар қабылданады. Шағымдар мен ұсыныстарды тиімді қарастыру үшін оларды тек ресми арналар арқылы жіберу қажет. Әлеуметтік желілердегі түрлі пабликтерде қалдырылған пікірлер әркез қарастырыла бермейді.