Бостандық ауданының тұрғындарымен кездесуде Алматы әкімі Ерболат Досаев денсаулық сақтау инфрақұрылымының дамуы туралы хабарлады. Медициналық қызметтердің сапасын арттыру үшін медициналық объектілердің құрылысы мен жаңғыртылуы белсенді жүргізілуде.
2024 жылдың желтоқсанында Перинатология және балалар кардиохирургиясы орталығының емханасына күрделі жөндеу аяқталды. Жаңартылған медициналық мекеме қауіпсіздік пен жайлылықтың жоғары стандарттарына сәйкес келеді. Емханада консультативтік-диагностикалық бөлімше, әйелдер консультациясы орналасқан, онда медициналық қызметтердің кең спектрі көрсетіледі. Орташа алғанда, емхана күніне 250-ден астам науқасқа қызмет көрсетеді.
Орбита-2,29а үй ш/а орналасқан №4 емхана филиалында күрделі жөндеу аяқталып қалды. Попов көшесі, 23 мекенжайындағы №12 емхананың негізгі ғимаратын күрделі жөндеу 90%-ға аяқталды. Жұмысты осы көктемде аяқтау жоспарлануда.
Сондай-ақ, қала әкімі жаңа емханалардың құрылысы туралы хабарлады.
«Алдыңғы кездесулерде уәде етілгендей, наурыз айында біз Серкебаев даңғылы мен Левитан көшесінің қиылысында 500 адам қабылдайтын емхана салуға кірістік. Жұмыстарды ағымдағы жылдың қараша айының соңына дейін аяқтау жоспарлануда», – деді Ерболат Досаев.
Бұдан басқа, 2025 жылғы маусымда мемлекеттік сараптаманың қорытындысын алғаннан кейін әл-Фараби даңғылы мен Санаторная көшесінің қиылысында 500 адам қабылдайтын екінші емхананың құрылысын бастау жоспарлануда.
Екі емхана да заманауи стандарттарға сай болады, оларда КТ және МРТ аппараттарымен жабдықталған клиникалық-диагностикалық орталықтар қарастырылған.
Айта кетейік, Бостандық ауданының тұрғындарына төрт мемлекеттік емхана қызмет көрсетеді, олар: №4, 7, 12, 17, сондай-ақ, мемлекеттік тапсырыс бойынша жұмыс істейтін жеке медициналық орталықтар.