^ жоғары
 
Негiзгi бет А А А
Арнайы нұсқа
Қаз Рус Eng   
 
     
 

 
 
Жұма, 28 сәуір 2017
 
     
 
Жаңалықтар
Алматыда Елбасы мақаласын талқылауға арналған қала активінің отырысы өтті
14 сәуір 2017

Бүгін Алматыда Қазақстан Республикасының Президенті Нұрсұлтан Назарбаевтың «Болашаққа бағдар: рухани жаңғыру» атты мақаласындағы келелі ой мен кесімді пікір бойынша, ел алдында тұрған мақсат-міндеттер мен атқарар істерді талқылау жөніндегі актив өтті.

Аталған шараға ғылыми-шығармашыл интеллигенция өкілдері, қалалық мәслихаттың депутаттары, қоғамдық кеңестің мүшелері, қалалық құрылымдардың басшылары, сарапшылар, білім, мәдениет, денсаулық сақтау және бизнес саласының өкілдері, тағы басқалар қатысты.

Жиынды ашқан қала басшысы Бауыржан Байбек, бұл өткенімізді бағамдап, болашағымызды нақтылайтын маңызы зор мақала деп, «Қазақстанның үшінші жаңғыруы: жаһандық бәсекеге қабілеттілік» атты Жолдауды рухани жағынан байыта отырып, еліміздің саяси және әлеуметтік-экономикалық жаңғыруының алғышарты ретінде ұлтымыздың сана-сезімінің жаңғыруын мақсат еткен бағдарламалық құжат деп баса айтты.

Сонымен қатар, Бауыржан Байбек – Елбасы мақаласына жан-жақты тоқталып, ұлы мақсатқа қол жеткізудің, яғни жаңғырудың басты 6 құрамдас бөлігін жік –жігімен түсіндірді. Олар: «Қазақ тілін латын әліпбиіне көшіру», «Жаңа гуманитарлық білім, қазақ тіліндегі 100 жаңа оқулық» жобасы, «Туған жер» бағдарламасы, «Қазақстанның қасиетті жерлері» жобасы, «Жаһандағы заманауи қазақстандық мәдениет» жобасы және алтыншы, «Қазақстандағы 100 жаңа есім» жобасы.

Мақалада ұлт болып қалыптасудың сыры мен сипаты жан-жақты ашылған. Аталған мақаланың бір бағыты «Туған жер» бағдарламасы. Елбасы: «Отбасына деген сезім Отанға деген үлкен сүйіспеншілікке ұласады», деген болатын. Олай болса, білімі мен біліктілігін ұштастырған, елім дейтін ерлер өз қалаларының көркеюі үшін аянып қалып жатқан жоқ.

««Туған жер» бағдарламасын іске асыруда алматылықтардың алар орны ерекше болады деп сенемін. Біздің қала мен оның жауапкершілікті, әлеуметтің мәселелерінен қашпайтын тұрғындары үшін мақалада көрсетілген идеялар мен үлгілер өте жақын. Мәселен, өткен жылдары кәсіпкерлердің қолдауымен қала аулаларында 100-ден астам спорт алаңқайлары ашылып, 10 шақты үлкен балабақша салынды. Мемлекет пен жеке әріптестік қағидасымен 600 оқушыға арналған заманауи талаптарға сай жайлы мектеп тұрғызылды. Тағы біреуінің құрылысы аяқталмақ. Қайырымдылық көмек, меценаттық қолдау қаншама. Осының бәрі түптеп келгенде елге деген перзенттік махаббатпен тығыз байланысты», - деді Бауыржан Байбек.

Ел еңсесін тіктеп, Тәуелсіздік алған жылдары Алматыда небары 18 ғана, оның өзінде қазақша-орысша тәрбиелейтін мемлекеттік балабақша болатын болса, бүгін оның саны 157-ге жеткен. Мектеп саны 7-ден 65-ке дейін ұлғайып, ондағы бала саны 11 мыңнан 104 мыңға дейін, яғни 10 есеге өскен. Бүгінде үш тұғырлы тіл саясатын дамытуды көздеген жастар мемлекеттік тілді, яғни қазақ тілін жетік меңгеріп, орыс және ағылшын тілдерін еркін игеріп жүр.

Жалпыхалықтық талқылауға түсіп, миллиондардың санасын серпілтіп, қалың аудиторияның жүрегіне жол тапқан бұл бағдарламаны зиялы қауым өкілдері де қолдайды. Олай дейтініміз, осыдан ширек ғасыр бұрын тәуелсіздігіміз қолға тиіп, мемлекеттігіміз тәй басқан тұста зиялы қауым өкілдері Елбасымыздың жанынан табылған еді. Демек, ең алдымен, руханиятымызды түгендедік, бабалар мұрасын насихаттап, тіл проблемасын кеңінен көтеріп, елдіктің рухын қайрадық.

«Мәдениеті өскен елдер үлкен елдердің қатарына қосылады. Сондықтан біздің де 30 елдің қатарына қосыламыз деген талпынысымыз бар. Мұнда мәдениет, әдебиеттің рөлі өте үлкен. Сондықтан біз жұмыс істеуіміз керек. Президентіміздің қала мен дала арасын жақындату жөнінде көтерген мәселесін әрқайсымыздың өз саламызда орындау міндетіміз. Сондықтан да осы руханияттың жаңғыру дер кезінде көтерілген мәселе деп ойлаймын», - деді КСРО және Қазақстанның Халық әртісі, Асанәлі Әшімов.

Елбасы мақаласында көпшілік талқылауына түскен мәселелердің бірі – 2025 жылға қарай баспа ісін, іс қағаздар мен оқулықтарды латын әліпбиінде басып шығару болатын. Ал, латын қарпі күнделікті өмірімізге дендеп кірсе, технология тілін түсініп, әлемнің озық елдерімен тереземіздің теңейе түсуіне мүмкіндік артады.

«Нұрсұлтан Әбішұлы Назарбаевтың «Болашаққа бағдар, рухани жаңғыру» мақаласы адамзат дамуының қазіргідей күрделі кезеңінде ұлт болып ұйысудың, жұрт болып жұмылудың жаңа үлгілерін ұсынатын жаңа тарихи құжат. Елбасы әлемнің дамыған елдерінің тәжірибесін алға тарта отырып, бәсекелестікке барынша бейім ұрпақ өсіруге, оларды күрескер етіп тәрбиелеуге айрықша тоқталады. Бұл мәңгілік ел үшін тарихи қажеттілік. Ол үшін сана- сезімізге рухани өзгеріс қажет. Ал өзгеру үшін жаңа дәуірдің жағымды жақтарын бойымызға сіңіруге тиіспіз. Біздер әдебиет пен өнер иелері Елбасының рухани жаңғыру деген ұстанымын қолдаймыз. Бұл бізді, халықты қанаттандырады, бұл Елбасымыз ұсынып отырған ұлы көш», - деді Қазақстан жазушылар одағының төрағасы Нұрлан Оразалин.

Естеріңізге салсақ, ел Тәуелсіздігінің 25 жылдығы мен Алматы қаласының 1000 жылдығы шеңберінде заманауи мультимедиялық «Алатау» дәстүрлі өнер театры мен «Мультимедиялық дәстүрлі өнер орталығы» ашылған болатын. Еліміздің мәдени орталығы саналатын Алматы үшін мұндай музыка орталығы – келген қонақтарға, жастарға, шетелдіктерге тек натуралды экспонаттар көрсетіп қана қоймай, заманауи мультимедиялық жүйелер арқылы қазақ, орыс және ағылшын тілдерінде ел мәдениетінің ерекшеліктері жөнінде мағлұмат алуға мүмкіндік береді. Алматы музейінің де негізгі ерекшелігі ақпараттандырудың мейлінше жаңа тәсілдеріне негізделуінде. Ал ондағы ағылшын тіліндегі контент кез келген шетелдіктің қала тарихынан нақты хабардар болуына қызмет етеді.

Тағы бір үлкен жоба, бұл – «Жаңа гуманитарлық білім, қазақ тіліндегі 100 жаңа оқулық» жобасы. Ол жоба әлемнің озық, заманауи және таңдаулы үлгілері негізінде жастарға жаңа деңгейдегі сапалы білім беруді қамтамасыз етуді көздейді.

«Елбасы білім саласының дамуына ерекше көңіл бөледі. Себебі ол құндылықтар жүйесінде білімді бәрінен биік қоятын ұлт қана табысқа жетеді дегеннің дәлелі. Тәуелсіздік жылдары елімізде 1300 мектеп салынып олардың негізінен қазақ мектебі болып ашылды. Мақалада көрсетілген Президент ұсынған барлық жобалар – латын әріпіне көшу, білім саласын арттыру және басқа да жобалардың барлығын іске асыруда ұстаздар қауымы алдыңғы шепте жүретініне күмәнданбаңыздар», - деді Қазақстанның еңбек сіңірген қайраткері Шәмшә Беркімбаева.

Бүгінде сөздің емес, істің адамына басымдылық беріледі. Мақалада Елбасы еліміздің жаңа технологияларға, жаңа әлемдік саяси-экономикалық ахуалға негізделген мүлдем жаңа тарихи кезеңге аяқ басқанын айта келе, осы тұстан сүрінбей өту, яғни Біртұтас Ұлт болу үшін қандай қасиеттерге ие болып, қандай міндеттерді еңсеру қажеттігі жөнінде кеңінен ой толғаған.

Үлкен екі бөлімнен тұратын мақаланың бірінші жартысында Елбасы кез-келген жаңғырудың ең алдымен ұлттық болмысқа, дәстүрдің замана сынынан сүрінбей өткен озығына негізделуін қадап айтқан. Яғни, жаңғыру ұлттың өз болмысынан, мәдениеті мен тарихынан сусындауы, соған сүйене отырып іске асуы қажет. Біз өткенін бағалайтын, болашағын бағамдайтын халықпыз. Демек, бұл өзгерістерге үрке қарап, тек қана өткенді жырлай беруден, жаңаның бәрін қисық деп тауып, кертартпалықтан ада болуды талап етеді.

Қорыта айтқанда, болашақтың кілті, көздеген мақсатқа кол жеткізіп, 30 мықты мемлекеттің қатарында болудың жолы - заман талабына сай көне мен бүгінгіні қисынды ұштастыра, өзіміздің рухани кодымызға сүйене отырып рухани жаңғыруда. Жеңіске жетелейтін сананы өзгертуде.

Міне, Елбасымыз сомдаған Жасампаз Ұлт формуласы осындай. Бұл ғайыптан түскен, болмаса ойдан шығарылған қағида емес. Бұл – жалпыәлемдік, баршамызға да 100 пайыз қатысы бар тарихи шындық.

Мақалада Елбасы осы ұлы мақсатқа қол жеткізудің, яғни рухани жаңғырудың басты 6 құрамдас бөлігін ұсынып отыр. Олар - заман талабына сай Бәсекелік қабілетке ие болу, қанағатшылдыққа, ұстамдылыққа сүйенген, даңғойлықтан мүлдем алыс шынайы Прагматизм, Ұлттық бірегейлікті сақтау, Білімнің салтанат құруы,Елдің эволюциялық жолмен дамуы және Сананың ашықтығы.

Осылайша, Елбасы мақаласында ХХІ ғасырдағы ұлттық сананы өрістетудің сара жолдарын ұсынады. Активке қатысқан үкіметтік емес ұйым жетекшілері, этомәдени бірлестік өкілдері өз пікірлерімен бөлісті. Жиын соңғында қала әкімі Бауыржан Байбек мақалада айтылған өзге де жайттарға қатысты жауапты мамандарға бірқатар тапсырмалар жүктеді.

Ал, Елбасы ұсынған ауқымды жобаларды тиімді іске асыру тек мемлекет қана емес барша қоғам үшін үлкен сын.

  «« | »» «  | Барлық жаңалықтар


Алматыда Мемлекет басшысының Жолдауын жүзеге асыру барысы талқыланды »»
21 сәуір 2017 - 16:14
Алматыда әкімдік мәжілісінде Қазақстан Республикасының Президенті Н.Ә.Назарбаевтың «Қазақстанның үшінші жаңғыруы: жаһандық бәсекеге қабілеттілік» Жолдауын жүзеге асыру барысы туралы айтылды. Қазіргі кезде Жалпыхалықтық Жоспар негізінде Жолдауда көрсетілген барлық негізгі бағыттар қамтылған қалалық Жоспарды жүзеге асырудың жобасы жасалған. Алматы әкімі Бауыржан Байбек өзінің сөзінде бюджеттік қаржыны жасау мен жұмсаудың тиімділігіне ерекше назар аудару қажеттігін атап өтті. 2016 жылы қала басш...
Б.Байбек - Алматыда құрылыс нысандарын салудың басты әлеуеті сапа мен сейсмикалық төзімділік болуы тиіс »»
21 сәуір 2017 - 09:52
Алматы әкімі типтік және жеке жобаларды жасайтын, нысандардың сейсмикалық төзімділігін анықтайтын, құрылыста заманауи ақпараттық технологияны қолдануды зерттейтін Қазақ құрылыс және сәулет ғылыми -зерттеу, жобалау институтының жұмысымен танысты. Бауыржан Байбек қала басшылығы үшін Алматыда құрылыс нысандарын салудың басты әлеуеті сапа мен сейсмикалық төзімділік болуы тиіс екендігін ерекше атап өтті. «ҚазҚҒЗЖИ» бас директоры Нұрлан Уранхаев құрылыстың сейсмикалық төзімділігін анықтауда, сейсмик...
Алматы әкімі Сингапурдың мемлекеттік министрлерімен кездесті  »»
20 сәуір 2017 - 18:35
Алматы әкімі Бауыржан Байбек Сингапур Респуликасының сауда индустрия және ұлттық дамудың мемлекеттік министрі Ко По Кун және Сингапур Республикасының денсаулық сақтау, коммуникация және ақпарат жөніндегі мемлекеттік министрі Чи Хун Тат бастаған сингапурлық делгеациясымен кездесті. Кездесу барысында Бауыржан Байбек Алматыны Сингапурдың инвестиция тарту, қаржы қызметі секторы мен туристік кластерді дамыту тәжірибесі қызықтыратынын атап өтті. Сонымен қатар сингапурлық делегацияға Алатау ауданындағы Индустриа...
 
     
   
 
   
Қазпошта сервиздері
 
 
 
 
Осы сайта жарияланған барлық материалдардың құқығы Алматы қаласының Әкімідігіне тиесілі.
© 2005-2017 Осы сайта жарияланған барлық материалдардың құқығы Алматы қаласының Әкімідігіне тиесілі.
Алматы қаласы әкімі Баспасөз қызметінің телефоны : +7 (727) 271-65-13